6×11 jubileum K.V. De Markoef Melick

Beste leefhöbbers van de Limburgse vastelaovend,

Es dörpse vasteloavesvereniging viert K.V. De Markoef oet Melick dit seizoen häör 6×11 jäörig jubileum. Uiteraard wille veer dit neet zomaar veurbie laote gaon. Hede ten dage is ’t namelijk ein heel oetdaging óm ein vereniging 6×11 jaor op de bein te haje en daomit ’t sjpel van de vastelaovend oet te drage binne ein gemeinsjap. Drökke agenda’s, meerdere hobbies en zake zowie eine oorlog of ein pandemie make ’t de vereniginge neet gemekkelijk. Tegeliekertied is ós ein dink in de aafgeloupe 66 jaor ouch duudelijk gewaore. Es d’r get is wo miensje behoefte aan höbbe, dan is ’t waal sociale contacte mit de medemiensj. En juus dao-aan probere veer (en mit ós uiteraard ouch alle angere vastelaovesvereninginge) ós sjteinke bie te drage door activiteite te organisere in ’t leech van de vastelaovend veur de ganse gemeinsjap, van jóngk toet aad ongeacht aafkomst, kleur, euvertuuging of wat dan ouch. En es det dan al 6×11 jaor lukt höbs se eine goje basis óm wiejer op te boewe maar is ‘t ouch gepas óm efkes sjtil te sjtaon bie dit heugdelijke feit en dit same te viere. En zowie det heurt doon veer det dan mit de ganse gemeinsjap. K.V. De Markoef zal op vriedig 25 en zaoterdig 26 november 2022 de sjporthal in Melick (Feel Fit Center Roerdalen) óm-tovere toet ein waar feespalies. Op vriedigaovend trappe veer om 19:30 oer aaf ónger ’t motte “Sjnaps-se…?” mit artieste zowie Wir Sind Spitze, DJ Admin en Otto Wunderbar. Op zaoterdigmiddig vervolge veer ómsjtreeks 15:00 oer  ós programma mit ózze Jeugmiddig 6×11 LIVE (jao ’t moog weer LIVE) wobie d’r diverse activiteite veur de jeug zölle zeen zowie ein indoor sjpringkusse, eine klimtore, ein escape room, eine ballonne-clown, sjminke, knutsele etc. en sjinke veer gratis ranja veur de jeug terwaal de “grote miense” kinne geniete van artieste zowie Tobias Berger. In de aovend gaon veer dan óm 19:30 oer wiejer op zien Limburgs mit “Plat Opgezat” wobie de Badmötse, Big Benny en Spik en Span acte de presence zölle gaeve. Tössedoor zal op beide dage DJ MAR alles aan-ein dreije en de sjtumming d’r good in haje. Op zaoterdig 14 januari 2023 wille veer dan de oudere generatie ouch nog ins traktere op eine gezellige middig mit koffie en vlaai, buutreedners en angere artieste. Op dees maneer probere veer (traditiegetrouw) alle generaties get te beje. Aan de eine kantj óm teruk te blikke op 66 sjoon vastelaovesjaore in ’t Melickse en aan de angere kantj óm de waeg in te zitte nao ós volgende jubileum. Geer zeet van herte welkóm op 25 en 26 november óm hie same mit ós ein begin aan te make! Kiek op www.markoef.nl, Facebook of Instagram veur meer info!

PS.: Ós jubileumreceptie zal plaatsvinje mit ós reguliere prinsereceptie en waal op zunjig 29 januari 2023. Mocht geer die wille bezeuke of höb geer nog angere vraoge m.b.t. ós jubileum, sjtuur dan ein berich nao info@markoef.nl.

Sjtichting 6×11 K.V. De Markoef